KNUS-те TOURISM NEXT 2026 халықаралық туристік инновациялар форумы өтті

Қазақ ұлттық спорт университетінде TOURISM NEXT 2026 халықаралық туристік инновациялар платформасы өтті.

«Туризмнің жаңа көкжиектері: жастар, ғылым, инновациялар және цифрлық трансформация» тақырыбындағы іс-шара туризм саласының өкілдерін, мемлекеттік органдарды, бизнесті және білім беру ұйымдарын бір алаңға біріктірді. Іс-шараға қонақүй және мейрамхана бизнесінің, этнотуризм, белсенді демалыс бағыттарының өкілдері, туроператорлар және туристік индустрияның өзге де мамандары қатысты.

Платформа аясында қонақжайлылық, этнотуризм, белсенді демалыс және туристік қызмет көрсету саласындағы ұйымдармен бірқатар ынтымақтастық туралы меморандумдарға қол қойылды. Атап айтқанда, KenDala, Drive Forum, «Қазжол Отель», ОЮЛ «ЦРГТ», «Атамекен» ҰКП, QAZAQ UY, Crocos Systems және The St. Regis Astana компанияларымен және ұйымдарымен әріптестік орнатылды.

Ынтымақтастықтың алғашқы нәтижесі де байқалды. The St. Regis Astana және басқа да серіктестер KNUS студенттерін тағылымдамадан өтуге қабылдап, алдағы уақытта жұмысқа орналасу мүмкіндіктерін ұсынды. Бұл университет пен туристік индустрия арасындағы байланыстың нақты нәтижеге бағытталғанын көрсетеді.

KNUS үшін бұл — серіктестік аясын кеңейтумен ғана шектелмейтін маңызды қадам. 2026–2027 оқу жылынан бастап университетте «Қонақжайлылық және туризм» жаңа білім беру бағдарламасы іске қосылды. Бағдарламаның басты ерекшеліктерінің бірі — студенттердің теориялық біліммен қатар, туристік индустрияның нақты ортасында тәжірибелік дағдыларды меңгеруіне мүмкіндік беру. Осылайша білім беру үдерісі туризм, спорт, мәдениет, цифрлық технологиялар және еңбек нарығының нақты талаптарымен ұштасады.

Іс-шараға Қазақ ұлттық спорт университетінің ректоры Тұрсынзада Қуангалиева және Қазақстан Республикасы Туризм және спорт министрлігі Туризм индустриясы комитеті төрағасының орынбасары Венера Прназарова қатысты.

TOURISM NEXT 2026 бағдарламасы ғылым, жастар, индустрия және технология мен практикалық тәжірибені тоғыстырған төрт негізгі бағытқа құрылды. Платформа барысында туризмнің жаңа трендтері, цифрлық туризм мен жасанды интеллект, тұрақты даму, туристік дестинацияларды дамыту және салаға қажетті жаңа буын мамандарын даярлау мәселелері талқыланды.

Сонымен қатар, студенттерге арналған туристік көрме ұйымдастырылып, оның негізгі мақсаты — жастарды туризм индустриясының нақты өкілдерімен таныстыру, тағылымдамадан өту, тәжірибе жинақтау және болашақта жұмысқа орналасу мүмкіндіктерін көрсету. Форум аясында студенттер өз өңірлерінің туристік әлеуетіне негізделген жаңа туристік өнімдер мен маршруттарды таныстырды.

Осылайша, KNUS туризм саласына маман даярлаудың жаңа моделіне көшіп келеді: академиялық білімнен — нақты индустриямен байланысқа, тәжірибеге және еңбек нарығына. Университетте дамып келе жатқан білім беру туризмі осы бағыттағы маңызды тетіктердің біріне айналмақ.