Қазақ ұлттық спорт университетінің өкілдері Қазақстан мен Қытай арасындағы спорттық ынтымақтастықты дамытуға бағытталған халықаралық семинарға қатысып жатыр.

Бағдарламаның алғашқы кезеңі Үрімші қаласында өтті. Семинар аясында университет өкілдері балалар мен жасөспірімдер спортын дамытудың заманауи тәсілдері, жас спортшыларды даярлау, сондай-ақ спорт пен білім беру жүйелерінің өзара ықпалдастығы мәселелеріне арналған тақырыптық білім беру сессияларына қатысты.

Қатысушылар Қытайдағы спорт инфрақұрылымын дамыту және спорттық даярлықты ұйымдастыру тәжірибесімен танысып, заманауи спорт нысандарын аралады. Сонымен қатар Қытайда қолданылатын практикалық шешімдермен тікелей танысуға мүмкіндік алды.

Семинардың негізгі бағыттарының бірі – Қазақстан мен Қытай мамандары арасында кәсіби тәжірибе алмасу. Әсіресе спорт резервін қалыптастыру, жастар спортын дамыту, спортшыларды даярлау жүйесін жетілдіру және спорттық білім беруге заманауи тәсілдерді енгізу мәселелеріне ерекше назар аударылуда.

Қазақ ұлттық спорт университеті үшін бұл бағдарлама халықаралық кәсіби байланыстарды кеңейтуге, озық тәжірибелерді зерделеуге және спорттық білім мен ғылым саласындағы жаңа ынтымақтастық бағыттарын дамытуға мүмкіндік беретін маңызды алаңға айналып отыр.

Халықаралық бағдарлама Пекин қаласында жалғасуда. Семинардың келесі кезеңдері Қазақстан мен Қытайдың спорт және білім беру салалары өкілдері арасындағы диалог пен тәжірибе алмасуды одан әрі жалғастыруға бағытталады.