Беларусь Республикасының делегациясы Қазақ ұлттық спорт университетіне келді
Қазақ ұлттық спорт университетіне Беларусь Республикасының Спорт және туризм министрі Сергей Ковальчук бастаған делегация ресми сапармен келді. Делегация құрамында Беларусь Республикасының Қазақстандағы Төтенше және Өкілетті Елшісі Алексей Богданов, Беларусь Республикасы Спорт және туризм министрлігінің жоспарлау және ұйымдастыру жұмыстары бас басқармасының бастығы Евгений Залесский, Күрес түрлері бойынша олимпиадалық даярлау орталығының директоры Жандос Үшкемпіров болды.
Сапар барысында делегацияға университеттің жоғары білікті спортшыларды, жаттықтырушыларды және спорт пен туризм саласындағы мамандарды даярлау мүмкіндіктері таныстырылды. Университеттің спорт ғылымы саласындағы жетістіктеріне және білім беру үдерісіне заманауи технологияларды енгізуге ерекше назар аударылды. Делегацияға KNUS ғылыми орталықтарының қоры, сондай-ақ спортшылардың функционалдық және физикалық көрсеткіштерін өлшеуге, әртүрлі бағыттағы жаттығуларды орындау кезіндегі қозғалыс биомеханикасын талдауға және жаттығу үдерісінің тиімділігін арттыруға бағытталған университет ғалымдарының жеке әзірлемелері ұсынылды. Қонақтарға техниканы талдау, қозғалыс белсенділігін бағалау және спортшыларды даярлауды ғылыми сүйемелдеу үшін қолданылатын компьютерлік көру технологиялары, SMART TABLE TENNIS, AI Video Analytics for Wrestlers және Digital Biomechanics Lab негізінде жасалған цифрлық шешімдер көрсетілді.
Делегация университеттің заманауи инфрақұрылымымен, еліміздің жетекші спорттық жоғары оқу орнының қалыптасу және даму тарихымен танысты, сондай-ақ KNUS мұражайы мен Спорттық дипломатия аллеясын аралады.
Бұл сапар Қазақстан мен Беларусь арасындағы спорт және жоғары білім саласындағы ынтымақтастықты нығайтудағы маңызды қадам болды. Тараптар академиялық алмасуды дамыту, бірлескен білім беру және ғылыми жобаларды жүзеге асыру, сондай-ақ жоғары сыныпты спортшыларды даярлаудағы өзара іс-қимыл перспективаларын талқылады.
Қазақ ұлттық спорт университетінің ректоры Тұрсынзада Қуанғалиеваның айтуынша, мұндай кездесулер халықаралық серіктестік, озық тәжірибе алмасу және спорт ғылымын, білім беруді және болашақ чемпиондарды даярлауды дамытуға бағытталған бірлескен бастамаларды жүзеге асыру үшін жаңа мүмкіндіктер ашады.